Një teori që po qarkullon gjerësisht në rrjetet sociale është se marrja e 50 miligramëve zink çdo ditë për pesë ditë para trajtimit me Botox mund të ndihmojë në zgjatjen e efekteve të tij. Por a ka vërtet bazë shkencore kjo ide?
Megjithëse mund të duket e pabesueshme, një studim ka treguar se zinku mund të zgjasë efektin e Botox-it deri në 30%. Sidoqoftë, dermatologu dhe nutricionisti Dr. Christian Merkel thekson se ka shumë pak studime mbi këtë temë, ndërsa kryesori prej tyre daton që nga viti 2012, me vetëm 77 pjesëmarrës.
Pse do të kishte ndonjë lidhje mes tyre? Zinku është një koenzimë e rëndësishme për metabolizmin e toksinës botulinike, e cila është përbërësi aktiv i Botox-it. Sidoqoftë, sipas Merkel, shumica e njerëzve marrin sasinë e nevojshme të zinkut përmes dietës së tyre të zakonshme dhe vetëm ata që kanë mungesë të provuar të zinkut mund të përfitojnë nga suplementet.
Sipas ekspertëve, provë të fortë shkencore nuk ka. Dr. Konstantin Vasyukevich nga New York Facial Plastic Surgery pohon se nuk ka dëshmi të mjaftueshme që suplementet e zinkut zgjatin efektet e Botox-it. Megjithatë, ai pranon se në rastet kur një person ka mungesë zinku, efekti i Botox-it mund të jetë më i dobët dhe marrja e zinkut mund të ndihmojë.
Dr. Merkel është dakord: “Marrja e 50 mg zink për pesë ditë para trajtimit nuk është e dëmshme, por nuk do të sjellë ndonjë përfitim për ata që nuk kanë mungesë të këtij minerali.”
Disa persona e metabolizojnë më shpejt Botox-in se të tjerët. Dr. Merkel shpjegon se ata që e prishin më shpejt efektin e Botox-it janë zakonisht:
▪ Individët shumë aktivë, me një normë të lartë metabolike
▪ Ata që merren rregullisht me sport
▪ Personat që flenë pak
Sa për disa mite të përhapura? Merkel i hedh poshtë pretendimet se:
▪ Ekspozimi ndaj nxehtësisë mund të shkurtojë efektin e Botox-it
▪ Aplikimi i kompresa të ftohta pas injektimit do ta zvogëlojë ndikimin e tij
▪ Pirja e kafesë pas trajtimit ndikon negativisht në rezultatet
Si të maksimizohet efekti i Botox-it?
Nëse zinku nuk është një metodë e sigurt për të zgjatur efektet e Botox-it, çfarë mund të ndihmojë?
Ekspertët sugjerojnë:
▪ Përdorimin e përditshëm të kremit kundër diellit për të mbrojtur lëkurën
▪ Hidratimin e duhur për të mbajtur lëkurën të shëndetshme
▪ Një dietë të balancuar për një metabolizëm të qëndrueshëm
▪ Minimizimin e stresit, pasi nivelet e larta të stresit mund të ndikojnë në trupin tuaj
Për ata që duan rezultate më të gjata, Dr. Jerry Chidester, kirurg plastik, sugjeron gjithashtu trajtime të rregullta në intervale të shkurtra, në mënyrë që muskujt të mbeten të relaksuar dhe të nevojiten më pak njësi Botox-i me kalimin e kohës.
Lajmi i mirë? Në nëntor 2024, është prezantuar një formulë e re e Botox-it, e cila ka treguar një efekt më të gjatë në studime klinike. Sipas Dr. Merkel, 75% e pacientëve janë ende shumë të kënaqur edhe pas 6 muajsh, shkruan Class.
Pra, a funksionon zinku për të zgjatur Botox-in? Mund të ndihmojë në rastet e mungesës së zinkut, por nuk ka prova të forta për ata që tashmë kanë nivele normale. Në vend të tij, kujdesi i mirë ndaj lëkurës, hidratimi dhe ekspozimi minimal ndaj diellit janë ende strategjitë më të mira për të ruajtur një fytyrë të lëmuar dhe të freskët.
