Ministri i Mjedisit dhe Planifikimit Hapësinor, Fatmir Matoshi, ka thënë se dështimi i projektit 12 milionësh për ambalazhimin e disa materieve të rrezikshme ka qenë i pa arsyeshëm pasi nuk ka pasur ndonjë rrezik për shkënditin e qytetarëve.
Matoshi, në emisionin ”Përballje” me gazetarin Muhamet Hajrullahu në RTV Dukagjini, ka thënë se projekti i parashikuar për menaxhimin e mbeturinave për të cilën është humbur donacioni i BE-së në vlerë prej 12 mijë eurove është keqkuptuar qysh në fillim.
“Shumë akterë këtij projekti i referohen në mënyrë të gabueshme, si ndërtim i një deponie për materie të rrezikshme. Në realitet fjala është dhe ka qenë për ndërtimin e disa magazinave në të cilat fillimisht do të ambalazhoheshin dhe pastaj do të deponoheshin në një periudhë të caktuar materie të rrezikshme që vijnë, zëmë shembull, nga dekomisionimi i ‘Kosovës A’, por edhe materie të rrezikshme që kemi gjithandej nëpër Kosovë, e që fatkeqësisht nuk janë sa duhet mirë të ambalazhuara”.
Matoshi thotë se me të marrë detyrën e ministrit të Ambientit projektin për mbeturinat e ka gjetur të gatshëm.
“Pastaj jam përballur me shqetësimet e Komunës së Fushë Kosovës, të cilët kanë thënë se nuk kanë qenë të njoftuar sa duhet. Fajtorë për dështimin projektit janë Komuna e Fushë Kosovës, Kryetari dhe asambleistët, pasi të njëjtët nuk kanë dashur të dëgjojnë se a paraqesin rrezik këto magazina”, tha ai, përcjell Telegrafi.
Ministri i Mjedisit dhe Planifikimit Hapësinor ka thënë se është shumë i rëndësishëm ambalazhimi i mbetjeve të rrezikshme që tashmë ekzistojnë në Kosovë, por jep një lajm të mirë sa i përket donacionit 12 milionësh të BE-së.
“Këto 12 milionët [eurot] mbesin në Kosovë. Pritet ditëve në vijim që të ri destinohen… Ne duhet të mësohemi karshi çështjeve që janë të rëndësishme”.
Matoshi thotë se Bashkimi Evropian është tërhequr nga projekti ende pa filluar faza e diskutimit publik të projektit dhe ndikimit të tij në ambient, pasi kishte një refuzim kategorik nga Komuna e Fushë Kosovës.
Ministri i Mjedisit dhe Planifikimit Hapësinor ka thënë se projekte të tilla janë implementuar edhe në qytete të Gjermanisë dhe nuk paraqesin rrezik për shëndetin e banorëve.
