Ahmeti: Autobusët e rinj do të qarkullojnë në Prishtinë para vitit të ri

Komuna e Prishtinës sot ka nënshkruar kontratën me kompaninë fituese për furnizimin me autobusë për Trafikun Urban.
Kryetari i Prishtinës, Shpend Ahmeti gjatë ceremonisë së nënshkrimit theksoi se procesi i stërzgjatur i projektit për autobusët po finalizohet sot.
Ai tha se 51 autobusët e rinj ‘Iveco’ do të qarkullojnë në Prishtinë para vitit të ri.
Ahmeti tha se autobusët modern do të ndihmojnë qarkullimin e qytetarëve më lehtë dhe më komod.
Kurse, përfaqësuesi i Trafikut Urban, Halil Mustafa tha se kjo kompani dhe punëtorët e saj kanë festuar sot, meqë po arrihet të realizohet ky projekt i stërzgjatur.
Vlera e këtij projekti arrin shumën e 13 milionë eurove.
Kompania me të cilën u arrit marrëveshja është Iveko nga Çekia.