Kryeministri i vendit Ramush Haradinaj, ka thënë se Projektligjet e transformimin e FSK-së në Ushtri do të kalojnë dhe në lexim të dytë, ndërsa duke folur për sigurinë në vend tha se kushdo që nxit apo krijon destabilitet në vend do të marr faturën e tij në fund.
Haradinaj këto deklarata i bëri në një konferencë për media, e cila u mbajt pas mbledhjes së Qeverisë, ku tha po ashtu Kosova do të bëhet me Ushtri dhe do të jetë pjesë e NATO-s.
“NATO është një vendimmarrës serioz. Ne jemi në komunikim të vazhdueshëm me ta. Jemi në bashkëpunim edhe me vendet tjera të rëndësishme të NATO-s. Procesi i mandatimit të Ushtrisë është me peshë. Dallimi është vetëm ndërrimi i emrit. Mos keni dilema. Jemi thellë të bindur, 17 institucione të sigurisë së Kosovës ishin pjesë e një organizimi të KFOR-it që isha dje. Ne jemi pjesë e NATO-s. Edhe në lexim të dytë do të kaloj. Ne do të bëhemi me ushtri”, ka thënë Haradinaj, raporton Telegrafi.
Kryeministri Haradinaj po ashtu komentoi edhe deklaratën e kryeparlamentarit, Kadri Veseli në lidhje me korrigjimin e kufijve.
Ai tha se i ka bërë përshtypje deklarata e Veselit se ideja e shkëmbimit të territoreve është ide e Serbisë dhe Rusisë.
“Më bëri përshtypje dje Veseli tha se shkëmbimi i territoreve është ide e Serbisë dhe Rusisë, ideja apo lëvizja e territoreve është shqetësuese dhe jam kundër kësaj”, theksoi ai.
Haradinaj potencoi sërish se ideja e korrigjimit të kufijve ka vdekur. Ai foli po ashtu edhe për situatën e sigurisë në Kosovë, ku tha se kushdo qoftë që nxit apo krijon destabilitet në vend do të marr faturën në fund.
“Ideja e korrigjimit ka vdekur. E dëgjuat dhe ambasadorin siç është shpreh. Nuk mendoj që shpërblehet dhuna apo incidentet. Cilido që e bën atë do ta merr faturën. Vetëm ata që e përkrahin stabilitetin në vend kanë me dal të fituar. Nëse dikush e nxit ndonjë incident me siguri ka me marr ndonjë faturë në fund”, tha ndër të tjera kryeministri i vendit, Ramush Haradinaj.
