Kryetari i Komunës së Skenderajt, Bekim Jashari ka uruar të gjithë qytetarët e Komunës me rastin e festës së Fiter Bajramit.
Jashari ka thënë se në jetë nuk është e lehtë për t’u bërë i devotshëm, dhe kështu, Ramazani i madhërishëm, është një periudhë ku veprat e mira bëhen me lehtësi dhe bekimet bëhen të kapshme.
Urimi i plotë i Bekim Jasharit:
Të nderuar qytetarë të Komunës së Skenderajt,
Të nderuar besimtarë të besimit Islam,
Të dashur vëllezër e motra,
Pas Muajit të shenjtë të Ramazanit, muajit të refuzimit të ushqimit, pijes apo ngrënies së çfarëdo ushqimi, përgjatë pjesës më të madhe të 24 orëshit ditorë, si pjesë esenciale e ekzistencës së njeriut, secili agjërues meriton të respektohet e të nderohet. Sakrifica juaj, si agjërues në këto ditë të nxehta, më shtojnë bindjen se fuqia e besimit ndaj Krijuesit të Madhërishëm, është më e madhe se temperaturat gjatë këtyre ditëve.
Në jetë nuk është e lehtë për t’u bërë i devotshëm, dhe kështu, Ramazani i madhërishëm, është një periudhë ku veprat e mira bëhen me lehtësi dhe bekimet bëhen të kapshme.
Të dashur vëllezër e motra,
Dikush mund të ketë dhuruar sadakanë tashmë, e dikush tjetër mbase është duke i dhuruar tek të afërmit nevojtarë, ashtu siç përcaktohet me rregullat e Islamit, dhe unë jam i sigurt se kjo, përveç përmbushjes së obligimit, tregon edhe anën tjetër hyjnore, atë të një njeriu a familjeje bujare, humane e zemërgjerë.
Të nderuar qytetarë të Skenderajt,
Muaji i Ramazanit po përmbyllet me Fitër Bajramin, festën e madhe të Botës islame, festën që ne shqiptarët na bënë t’a duam më shumë njëri-tjetrin, t’i respektojmë e t’i çmojmë të dashurit tanë, të vazhdojmë të solidarizohemi me të varfërit, e të ruajmë traditën e të parëve tanë për të promovuar islamin e hapur e tradicional. Dhe, duke ndjekur këto parime, kontribuojmë edhe në promovimin e tolerancës fetare.
Të nderuar qytetarë të Komunës së Skenderajt,
Të nderuar besimtarë të besimit Islam,
Të dashur vëllezër e motra,
Në emër të familjes sime, timin personalisht, të gjithë punëtorëve të Administratës së Skenderajt, drejtorëve dhe bashkëpunëtorëve të mi, i’u uroj Gëzuar Fitër Bajramin!
I Juaji,
Bekim (Hamëz) Jashari
Kryetar i Komunës së Skenderajt
