Sot në Washington mbahet rituali tradicional Lutja e Mëngjesit. Në këtë manifestim marrin pjesë shumë personalitete të larta politike e biznesore nga mbarë bota.
Tash e disa vite, Kosova është pjesë e këtij rituali me përfaqësues të vet shtetërorë.
Në Kosovë ndër vite ka një garë se kush do të shkojë në këtë ceremoni si për të pasur nevojë të lahen mëkate të brendshme.
Por, sivjet, siç merr vesh Koha.net, delegacioni është më i madh se asnjëherë më parë.
Ndaras ose bashkë në Washington për t’u lutur tashmë janë presidenti i vendit Hashim Thaçi dhe ministri i Punëve të Jashtme, Behgjet Pacolli. Për në Uashington thuhet të ketë udhëtuar edhe kryeministri i Kosovës, Ramush Haradinaj, i cili gjatë kësaj jave u pajis me vizë amerikane.
Rëndom zyrtarët e lartë të vendit udhëtojnë, më së paku me dy ose më shumë bashkëpunëtorë të vet.
Krejt ndaras nga qeveritarët e Kosovës, por me bashkëshorten e vet, në Washington tash e disa ditë po qëndron edhe zëvendëskryeministri i Kosovës Dalibor Jevtiq. Ai atje po zhvillon politikë kundër Kosovës.
Në kryeqytetin e SHBA-së, për të njëjtin qëllim, tashmë gjendet ministri i Inovacionit Besim Beqaj.
Në Washington janë edhe përfaqësues nga Kuvendi: Blerta Deliu nga PDK në pushtet dhe Armend Zemaj nga LDK në opozitë. Nuk dihet në është e “përfaqësuar” edhe Vetëvendosje këtu. Ndoshta ka pasur mosdakordim për emrin e zyrtarit të saj pas ndarjeve në këtë parti.
Ndoshta nuk janë numëruar të gjithë, por sipas gjasave nga Kosova në Lutje të Mëngjesit marrin pjesë të paktën 15 persona.
Llogaritë e shpenzimeve ka kush t’i heqë: Taksapaguesi i shkretë.
E sa mund të jenë këto shpenzime, vetëm mund të supozohet, sigurisht dhjetëra-mijëra euro.
