Presidenti rus Vladimir Putin njoftoi një armëpushim të përkohshëm në Ukrainë për Pashkë, tha Kremlini të shtunën.
Sipas Kremlinit, armëpushimi do të zgjasë nga ora 6 pasdite, sipas orës lokale të Moskës, të shtunën deri në mesnatë pas të dielës së Pashkëve.
Megjithatë, nuk është e qartë nëse Kievi e ka pranuar këtë propozim.
“Udhëhequr nga konsideratat humanitare, sot nga ora 18:00 deri në 00:00 nga e diela deri të hënën, pala ruse shpall armëpushimin e Pashkëve. Unë urdhëroj që të gjitha veprimet ushtarake të ndërpriten për këtë periudhë”, tha Putin në një takim me shefin e Shtabit të Përgjithshëm Valery Gerasimov, siç e citon Shërbimi i Shtypit të Kremlinit, njofton BBC.
“Ne supozojmë se pala ukrainase do të ndjekë shembullin tonë. Në të njëjtën kohë, trupat tona duhet të jenë të gatshme për të zmbrapsur shkeljet e mundshme të armëpushimit dhe provokimet nga armiku, çdo veprim të tij agresiv”, tha Putin.
Njoftimi erdhi në të njëjtën ditë kur Ministria e Mbrojtjes e Rusisë tha se forcat e saj i shtynë forcat ukrainase nga një nga pikat e tyre të fundit të mbetura në rajonin Kursk të Rusisë. Forcat ruse morën kontrollin e fshatit Oleshnya, në kufirin me Ukrainën, tha ministria.
Associated Press nuk ishte në gjendje të verifikonte menjëherë pretendimin dhe nuk pati asnjë përgjigje të menjëhershme nga zyrtarët ukrainas.
Sipas agjencisë shtetërore ruse të lajmeve TASS, Rusia ende po lufton për të shtyrë forcat ukrainase nga fshati Gornal, 11 kilometra në jug të Oleshnya.
“Ushtria ruse ende nuk i ka shtyrë forcat e armatosura ukrainase nga Gornal… në mënyrë që të çlirojë plotësisht rajonin e Kurskut. Luftimet e ashpra janë duke u zhvilluar në vendbanim,” raportoi agjencia, duke cituar agjencitë e sigurisë ruse.
Ushtarët rusë dhe koreano-veriorë thuajse e kanë privuar Kievin nga një element kyç negociues duke rimarrë pjesën më të madhe të rajonit, ku trupat ukrainase organizuan një inkursion të befasishëm vitin e kaluar.
Në zhvillime të tjera, forcat ajrore ukrainase raportuan se Rusia gjuajti 87 dronë shpërthyes dhe mashtrues në valën e fundit të sulmeve gjatë natës së së shtunës. Ai tha se 33 prej tyre u kapën dhe 36 të tjerë u humbën, me gjasë që ishin bllokuar në mënyrë elektronike.
Sulmet ruse dëmtuan fermat në rajonin e Odesa-s dhe ndezën zjarre në rajonin Sumy gjatë natës, tha të shtunën Shërbimi Shtetëror i Emergjencave të Ukrainës. Zjarret janë vënë nën kontroll dhe nuk raportohet për viktima.
Ministria e Mbrojtjes e Rusisë, ndërkohë, tha se sistemet e saj të mbrojtjes ajrore rrëzuan dy dronë ukrainas gjatë natës së shtunës.
