Ministri i Bujqësisë, Faton Peci është kritikuar se cenoi dinjitetin e grave të Krushës, pas deklarimeve dhe sulmeve publike ndaj Fahrije Hotit, drejtoreshë e Kooperativës Bujqësore “Krusha”, e cila mohoi kategorikisht se është paditur ndonjëherë dhe që të ketë marrë ftesë nga ndonjë gjykatë.
Gjatë konferencës dje, Hoti i kërkoi ministrit Peci që të reflektojë me kërkim falje publike ndaj grave të Krushës të cilat u bënë subjekt debati publik pas refuzimit që iu bë një projekti të tyre nga shteti.
“Çka ka dashtë me thanë zoti Faton Peci kur e ka nxjerr faktin ose dokumentin, që kjo është e paditur? Çka saktësisht ka dashtë me thanë?”, ka pyetur Lirim Mehmetaj në Debat Plus.
“Metoda e njëjtë e tyre; mos u arsyeto, sulmo. Për shembull, ai nuk e ka aspak dert që mund ta dëmtojë edhe në biznes. E ka involvu me tendencën e përlyerjes”, tha ai.
Mehmetaj foli më tej për drojën të cilën e vuri re Hoti nga frika e asaj që ai e quan “ushtria e moralistëve të VV-së”.
“Unë vërejta diçka në konferencën e zonjës Hoti, një zonjë e guximshme, por njëfarë droje e kishte duke e ditur ushtrinë e moralistëve të VV-së që sulmojnë me krejt çka kanë. E vërejtsha që kjo frikësohet pak në kuptimin e përfshirjes së saj në një betejë më pushtetin duke e pasë parasysh që ekziston mbështetje më e madhe për Kurtin, rrjedhimisht edhe për Faton Pecin. Unë veç i pash komentet me fake news, të kontrolluara nga nga Vetëvendosje qysh e dimë të gjithë, me sha e me ofendu.” – tha ai.
