Komisioni Qendror i Zgjedhjeve (KQZ) që nga 29 gushti ka hapur periudhën e aplikimit për regjistrimin e votuesve jashtë Kosovës.
Gjatë kësaj kohe, për gati 42 ditë, ky institucion ka regjistruar 6,240 shtetas të Kosovës për të votuar në përfaqësi diplomatike apo përmes postës.
Këto të dhëna janë bërë të ditura nga zëdhënësi i KQZ-së, Valmir Elezi, i cili ka treguar se procesi i regjistrimit të votuesve jashtë Kosovës do të përfundojë më 26 dhjetor 2024.
Regjistrimi i votuesve është duke u bërë përmes platformës elektronike http://diaspora.kqz-ks.org
“Është duke vazhduar periudha e aplikimit për regjistrim të votuesve jashtë Kosovës, e cila ka filluar më 29 gusht dhe do të përfundojë më 26 dhjetor 2024. Në bazë të të dhënave, deri më tani përmes platformës elektronike, janë pranuar 6,793 kërkesa për regjistrim, prej të cilave janë aprovuar 6,240, ndërsa 553 të tjera janë refuzuar. Në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit”, tha Elezi.
Sipas ligjit për zgjedhjet e përgjithshme, votuesit, në momentin e regjistrimit mund të përcaktohen individualisht për mënyrën e votimit: të votojë fizikisht në njërën nga përfaqësitë diplomatike të Republikës së Kosovës; duke dërguar fletëvotimin përmes postës në kutinë postare të KQZ në Kosovë dhe duke dërguar fletëvotimin përmes postës në një nga kutitë postare të hapura nga KQZ jashtë Kosovës.
Mbështetur në të dhënat e prezantuara nga Elezi, regjistrimi për të votuar përmes postës mbetet mënyra më e preferuar për shtetasit e Kosovës në krahasim me votimin fizikisht në përfaqësitë diplomatike.
“Nga 6,240 aplikime të aprovuara, 2,062 shtetas të Kosovës janë regjistruar për të votuar fizikisht në përfaqësi diplomatike, 738 janë regjistruar për të dërguar pakon me fletëvotim në kutinë postare të KQZ-në në Kosovë dhe 3,440 janë regjistruar për të dërguar pakon me fletëvotim në kutinë postare jashtë Kosovës”, njoftoi Elezi.
Më tej, sipas Elezit, në bazë të vendimit të KQZ-së, votimi në përfaqësi diplomatike, i cili do të organizohet për herë të parë në historinë elektorale të Kosovës, do të mbahet në 22 shtete të ndryshme.
“Sipas listës së Qendrave të Votimit të miratuara nga KQZ-ja, votimi do të organizohet në 22 shtete, respektivisht në 19 ambasada dhe 16 konsullata të Republikës së Kosovës. Sipas Ligjit për Zgjedhjet e Përgjithshme, votimi në përfaqësi diplomatike organizohet një ditë para ditës së zgjedhjeve në Kosovë, pra më 8 shkurt 2025. Votimi fillon në ora 07:00 dhe mbyllet në ora 19:00, sipas orës lokale të vendit përkatës”, tha ai.
Sipas planit të aktiviteteve të KQZ-së, afati për dërgimin e fletëvotimeve përmes postës në kutinë postare të shtetit ku është regjistruar votuesi apo në shtetin më të afërt ku është hapur kutia postare e KQZ-së fillon më 9 janar dhe përfundon më 8 shkurt 2025.
Në këto data është caktuar edhe afati për dërgimin e fletëvotimeve përmes postës në kutinë postare të KQZ-së në Kosovë./kp
