Presidenti i ShBA-së, Joe Biden ka dërguar edhe 1000 ushtarë të tjerë aktivë për të forcuar përpjekjet e ndihmës në juglindje të ShBA-së, pasi rajoni u godit nga uragani Helene.
Këta ushtarë do t’i bashkohen 6,000 anëtarëve të Gardës Kombëtare dhe 4,800 punonjësve të ndihmave federale, të ngritur tashmë në gjashtë shtete të goditura nga moti ekstrem, raporton BBC, transmeton Klankosova.tv.
Të paktën 175 njerëz tashmë dihet se janë vrarë nga uragani Helene, një nga stuhitë më vdekjeprurëse që ka goditur ShBA-në në kohët e fundit.
Qindra të tjerë mbeten të zhdukur, me ekipet e kërkimit dhe shpëtimit që po luftojnë për të arritur në zona të largëta.
Helene goditi ShBA-në të enjten si një uragan i kategorisë 4 – më i fuqishmi në histori që ka goditur Big Bend të Floridës – përpara se të përshkonte shtetet fqinje dhe të zvogëlohej në një stuhi tropikale.
Viktimat, sipas mediave, janë regjistruar në gjashtë shtete: Karolina Veriore, Karolina Jugore, Gjorgja, Florida, Tenesi dhe Virgjinia.
Numri i viktimave ka tejkaluar atë të uraganit Ian, i cili shtatorin e vitit 2022 u bë një nga stuhitë më vdekjeprurëse të shekullit të 21-të – duke marrë jetën e 156 personave.
