Zëvendëministri i Infrastrukturës, Hysen Durmishi, ka bërë të ditur se kanë shfuqizuar vendimin për ndalimin e automjeteve për transportin e mallrave me peshë më të madhe se 7,5 tonë.
Ai ka thënë se ky vendim po shfuqizohet pasi pritet të ketë rënie të temperaturave.
“Duke marrë parasysh parashikimin e motit nga Instituti Hidrometeorologjik i Kosovës, sipas të cilit parashihen rënie të ndjeshme të temperaturave ditëve në vijim, kemi marrë vendim: Shfuqizimin e vendimit të datës 13 korrik 2024, për ndalimin e qarkullimit në Autoudhë, Rrugë Nacionale dhe Rajonale të automjeteve për transportin e mallrave me peshë më të madhe se 7.5T. Faleminderit për mirëkuptimin tuaj gjatë këtyre ditëve me temperatura të larta.” – ka shkruar Durmishi.
Ky vendim ishte kundërshtuar për shkak të pengesave që kishte krijuar në qarkullimin e mallrave.
