Shërbimi Korrektues i Kosovës ka konfirmuar sonte se edhe një person tjetër është larguar nga burgjet e Kosovës, duke qenë ky i dyti pas arratisjes së Faton Hajrizit nga Burgu i Smrekonicës.
Në media u raportua se i arratisur sonte është Ujkan Metaj nga Burgu i Dubravës.
Ujkan Metaj ishte dënuar me 7 vite burg pasi që kishte ndihmuar tani të ndjerin Kamer Metaj për të kryer grabitjen e bankës në Istog, ku në këtë rast, si pasojë kishte mbetur i vrarë polici Izet Demaj.
Gjykata Themelore në Pejë gjatë 2019 e kishte dënuar me pesë vjet burg, të akuzuarin Ujkan Metaj, pasi i njëjti e kishte pranuar fajësinë se e kishte ndihmuar tani të ndjerin Kamer Metaj, për të kryer grabitjen e bankës në Istog.
Gjatë kësaj grabitje, gjatë shkëmbimit të zjarrit me pjesëtarë të policisë, kishte mbetur i vdekur edhe grabitësi Kamer Metaj.
Por më pas Gjykata e Apelit ia shtoi edhe dy vjet, e që në plotëni ai për këtë rast u dënua me 7 vjet burgim
Në bazë të këtij aktgjykimi është shqiptuar edhe dënimi plotësues, konfiskimi i automjetit “Golf 4”, pronë e tani të ndjerit Kamer Metaj, një pushkë automatike “AK 47”, një granat dore “M-75” dhe një revole e tipit “Çeska”, raportonte atë kohë “Betimi për Drejtësi”.
Përndryshe ndaj Metajt ka ekzistuar edhe një aktakuzë për tentim vrasje.
Ndryshe, sipas aktakuzës së ngritur nga Prokuroria Themelore në Pejë, më 5 maj 2018, pretendohet se i akuzuari Ujkan Metaj, me 3 dhjetor 2017, rreth orës 11:25, në afërsi të fshatit Rakosh, Komuna e Istogut, ka tentuar ta privojë nga jeta të dëmtuarin Bajram Sadrijaj, në lidhje me detyrën zyrtare të tij, dhe e ka vu në rrezik jetën e personave të tjerë, dhe atë të dëmtuarit Sokol Januzaj.
