Gjykata Ndërkombëtare e Drejtësisë të premten e urdhëroi Izraelin që ta ndalë menjëherë ofensivën ushtarake në qytetin jugor të Gazës, Rafah, duke e përmendur si arsyetim “rrezikun e menjëhershëm” ndaj popullit palestinez. Megjithatë, gjykata ndërkombëtare me seli në Hagë lëshoi edhe tre urdhra të tjerë ndaj këtij shteti.
Gjykata vlerësoi se janë plotësuar kushtet për marrjen e masave emergjente në rastin e paraqitur nga Afrika e Jugut, ku Izraeli akuzohet për gjenocid.
Rrjedhimisht:
1. GjND-ja e urdhëroi Izraelin që të sigurojë qasje në Rripin e Gazës për hetuesit, raporton agjencia “Reuters”.
2. GjND-ja e urdhëroi Izraelin që ta hapë pikëkalimin kufitar në Rafah për futjen e asistencës humanitare.
3. Gjykata Ndërkombëtare e Drejtësisë gjithashtu e urdhëroi Izraelin që të dorëzojë brenda një muaji një raport rreth masave që i ka marrë.
Izraeli i ka mohuar akuzat për gjenocid. Në mbrojtje të këtij vendi kanë dalë Shtetet e Bashkuara.
