Bodo Weber, bashkëpunëtor i lartë në Këshillin joqeveritar për Politikat e Demokratizimit në Berlin, ka komentuar letrën që Qeveria e Kosovës e dërgoi në adresë të Këshillit të Evropës, ku u zotua për dërgimin e draftit të Asociacionit në Gjykatën Kushtetuese.
Analisti gjerman ka theksuar se është skeptik që do të ndryshojë ndonjë gjë.
“Jam skeptik, duke marrë parasysh se refuzimi i Qeverisë së [kryeministrit të Kosovës, Albin] Kurti për të prezantuar draftin e vet, ka shtyrë [të dërguarin evropian për dialog, Mirosllav] Lajçakun dhe QUINT-in të hartojnë propozimin e tyre, dhe për faktin që Prishtina po kërkon nga Berlini, Parisi dhe Roma të votojnë këtë javë për diçka që do të mund ta shohin më vonë”, ka deklaruar Weber për Radio Evropa e Lirë.
