Xhiro e 26-të e Albi Mall Superligës së Kosovës në futboll nis sot me dy ndeshje në program.
Vëmendja kryesore do të jetë padyshim në Suharekë, kur Ballkani mirëpret skuadrën e Llapit.
Vendi i parë dhe vendi i dytë, të cilët i ndajnë vetëm një pikë, duelojnë sot kokë-më-kokë për pozitën e parë, shkruan Sinjali Sporti.
Të dy skuadrat vijnë pas humbjeve, me Ballkanin e cila u befasua nga Fushë Kosova si mysafir duke humbur 2-0, kurse Llapi u mposht si mysafir nga Malisheva 2-1.
Ballkani qëndron si lider i tabelës me 51 pikë të mbledhura, e ndjekur nga Llapi me 50, kurse Drita e treta me 49 pikë që luan nesër.
Dueli tjetër që zhvillohet sot është ai mes Lirisë dhe Malishevës.
Malisheva ndodhet në një ecuri fantastike ku ka 8 fitore dhe vetëm dy humbje në 10 ndeshjet e fundit kampionale, e cila pozicionohet në vendin e katërt me 44 pikë.
Liria ndërkohë është pa fitore në 21 ndeshjet e fundit kampionale (16 humbje, 5 barazime), me të fundit dhe të vetmen të arritur këtë sezon ndaj Fushë Kosovës 2-1 më 2 shtator.
Prizrenasit ndodhen në pozitën e fundit me 10 pikë të mbledhura pas 26 xhirosh.
Të dyja duelet zhvillohen nga ora 13:00.
