Liburn Aliu, ministër i Mjedisit, Planifikimit Hapësinor dhe Infrastrukturës, ka njoftuar se është bërë shpronësimi i Lokalitetit Arkeologjik Ulpiana, raporton Prishtinapress.
Ministri përmes një postimi në rrjetin e tij social, Facebook ka thënë lajmin se sot është finalizuar vendimi i shpronësimit për realizimin e Projektit të Lokalitetit Arkeologjik Ulpiana.
“Pas vendimit të parë të datës 12 Tetor, 2023, kur edhe nisi procesi i shpronësimit të pronave, sot, finalizuam të gjitha vendimet e shpronësimit për realizimin e Projektit të Lokalitetit Arkeologjik Ulpiana. Marrë parasysh rëndësinë e trashëgimisë arkeologjike, Qeveria jonë i ka ndërmarrë të gjitha hapat e duhura për mbrojtjen dhe promovimin e këtij lokaliteti, njëherit mbishkrimit i cili paraqet një dëshmi shumë të rrallë të historisë dhe lashtësisë së Popullit Shqiptar”, ka shkruar Aliu.
