Aeroporti Ndërkombëtar i Prishtinës ‘Adem Jashari’ ka njoftuar se numri i udhëtarëve dhe fluturimeve po vazhdon me trend të rritjes.
Sipas njoftimit, në muajin janar janë shërbyer 287 mijë e 205 udhëtarë apo 21.9 për qind më shumë se sa në muajin janar 2023 dhe 996 fluturime apo 23.3 për qind më shumë krahasuar me janar 2023.
Muaji janar 2023 kishte 235 mijë e 576 udhëtarë dhe 808 fluturime të shërbyera.
“Kjo rritje e jashtëzakonshme thekson përkushtimin e aeroportit për të ofruar përvoja të reja për udhëtarët e saj duke qenë të orientuar edhe në shtimin e destinacioneve apo rritjen e fluturimeve në destinacionet ekzistuese në vitin 2024”, thuhet në komunikatën për media.
Për të përmbushur kërkesat e udhëtarëve, Aeroporti i Prishtinës ka bërë të ditur se këtë vit ka shtuar destinacionet e reja Luxembourg, Riga, Izmir, Heraklion, Halmstad etj.
