Profesori universitar, Milazim Krasniqi ka komentuar reagimet pas aktgjykimit dënues për deputetin e AAK-së, Pal Lekaj në rastin e njohur si “53 milionëshi”.
Krasniqi ka thënë se ka vërejtur një “gëzim pervers” për dënimin e ish-Ministrit Lekaj. Profesori Krasniqi ka thënë se kjo flet për një shoqëri të mbushur me inate, komplekse e dëshirë për hakmarrje.
“Kurrë në jetë nuk kam ndejtë me Dr. Pal Lekajn. Nuk kam preferencë partiake për AAK. Nuk di gati kurrgjë për mënyrën si janë paguar ata milionë, kur ai ishte ministër. Vetëm një gjë e di: ky gëzim pervers për dënimin e tij, nuk flet për Palin, po flet për një shoqëri të mbushur me inate, komplekse, dëshirë për hakmarrje. (Natyrisht këtu nuk bie humori i lehtë që bëhet.) Si rregull, nuk duhet të gëzohemi për problemet a fatkeqësinë e askujt. Gëzimi për fatkeqësinë e tjetrit nuk është as vlerë kristiane, as islame, as laike”, ka shkruar Krasniqi.
Gjykata Themelore e Prishtinës, ka shpallur dje aktgjykim dënues ndaj deputetit të AAK-së, Pal Lekaj dhe tre të tjerëve në rastin e njohur si “53 milionëshi”.
Gjykata e dënoi me tri vite e tetë muaj burgim deputetin e AAK-së, Pal Lekaj.
Ai është dënuar për keqpërdorim të detyrës zyrtare e dëmtim me dashje të buxhetit të shtetit.
Sipas aktakuzës së ngritur më 4 shkurt 2022 nga Prokuroria Speciale e Republikës së Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar i Përgjithshëm në këtë ministri, në bashkëveprim dhe me dashje edhe me të pandehurin Besim Tahiri, drejtor i Prokurimit Publik në MI, akuzoheshin për keqpërdorim të detyrës zyrtare me rastin e
ndarjes së 53 milionë eurove për konsorciumin “Bechtel &Enka”, për ndërtimin e autostradës Prishtinë – Hani i Elezit apo e njohur ndryshe si autostrada “Arbën Xhaferi”.
