Mbretëria e Bashkuar do të kryejë fluturime vëzhgimi të paarmatosura mbi Lindjen e Mesme për të kërkuar vendndodhjet e pengjeve të Hamasit, thotë Ministria e Mbrojtjes britanike.
Fluturimet do të ndihmojnë në mbledhjen e informacionit mbi vendndodhjen e mundshme të pengjeve.
Pesë shtetas britanikë janë të zhdukur dhe qeveria e Mbretërisë së Bashkuar nuk ka thënë se sa prej tyre mund të mbahen nga Hamasi.
“Siguria e shtetasve britanikë është përparësia jonë më e madhe”, tha Ministria e Mbrojtjes, raporton BBC, transmeton Gazeta Express.
“Në mbështetje të aktivitetit të vazhdueshëm të shpëtimit të pengjeve, Ministria e Mbrojtjes do të kryejë fluturime vëzhgimi mbi Mesdheun lindor, duke përfshirë operimin në hapësirën ajrore mbi Izrael dhe Gaza.”
Ajo shtoi se avioni do të jetë i paarmatosur dhe do të ketë për detyrë vetëm të gjejë pengjet.
“Vetëm informacioni në lidhje me shpëtimin e pengjeve do t’u kalohet autoriteteve përkatëse përgjegjëse për shpëtimin e pengjeve”.
Avioni do të jetë Shadoë R1, të cilat Forcat Ajrore Mbretërore i përdorin për mbledhjen e inteligjencës, thanë zyrtarët e ministrisë.
Informacioni mbi vendndodhjet e mundshme të pengjeve do të ndahet me Izraelin. Më shumë se 130 robër mendohet të jenë në Gaza.
Pentagoni tha se dronët UAV të paarmatosur ishin vendosur mbi Gaza në “mbështetje të përpjekjeve për rikuperimin e pengjeve”, në fillim të këtij muaji.
“SHBA-ja po kryen fluturime të paarmatosura me UAV mbi Gaza, si dhe po ofron këshilla dhe ndihmë për të mbështetur partnerin tonë izraelit ndërsa ata punojnë në përpjekjet e tyre për rikuperimin e pengjeve”, tha Pentagoni.
Luftimet rifilluan të premten pas një armëpushimi njëjavor në Gaza. IDF (ushtria izraelite) tha se kishte goditur më shumë se 400 objektiva të Hamasit në ditën e parë.
Ministria e shëndetësisë e Gazës e drejtuar nga Hamasi thotë se të paktën 193 persona janë vrarë në valën e fundit të sulmeve izraelite.
Ministria thotë se më shumë se 15,200 njerëz kanë vdekur në luftën në Gaza, të shkaktuar nga sulmi i Hamasit ndaj Izraelit më 7 tetor, i cili vrau të paktën 1,200 njerëz.
