Policia e Kosovës ka zhvilluar sot një aksion policor për kapjen e personave që dyshohet se janë përfshirë në grabitjen e armatosur në argjendarinë ‘Diakos’ në Suharekë. Gjatë aksionit ka pasur shkëmbim zjarri mes Policisë dhe të dyshuarve, me ç’rast ka mbetur i vrarë Dukagjin Gashi, i dyshuar si një prej organizatorëve të grabitjes, raporton Gazeta Sinjali.
Gjatë aksionit në lagjen Arbëria në Prishtinë, u arrestuan edhe dy të dyshuar tjerë, Bujar Basha e Leotrim Cakolli, teksa një person është arratisur.
Sinjali mëson se bëhet fjalë për Korab Gashin, vëllain e të vrarit, Dukagjin Gashi.
Dy vëllezërit Gashi dyshohet të jenë përfshirë në grabitjen në Suharekë, ku nën kërcënimin e armës vodhën stoli ari në vlerën e rreth 250 mijë eurove.
Sipas burimeve, gjatë aksionit ka mbetur i plagosur edhe një zyrtar policor.
Nuk dihet ende nëse plagët që mori janë nga arma, apo gjatë konfrontimit me të dyshuarin, tashmë i vrarë.
