Policia e Kosovës ka gjetur veturën e cila është përdorur në grabitjen e armatosur në argjendarinë “Diakos” në Suharekë.
Këtë për Paparaci.com e ka konfirmuar edhe policia e Kosovës. Në një komunikim zyrtar me mediumin, nga policia kanë bërë të ditur se vetura është gjetur në fshatin Jezerc, shkruan Paparaci.com.
“Mund të konfirmojmë se sot, në orët e pasditës pas hetimeve të zhvilluara, në fshatin Jezerc është gjetur vetura e cila dyshohet se ishte përdorur në rastin e grabitjes në Suharekë.”, thotë policia për Paparaci.com.
Gjithashtu, policia thotë se “Njësitet relevante policore janë duke kryer ekzaminimin e veturës, për të vazhduar me konfiskimin dhe procedurat e mëtejme hetimore.”
Ndryshe, mbrëmjen e së mërkurës ka ndodhur një plaçkitje e armatosur në një argjendari në qytetin e Suharekës. Në tentativën për ta parandaluar plaçkitjen, është plagosur një polic i Kosovës në këmbë.
Nga ky incident përveç një polici të plagosur, ka mbetur edhe një tjetër i lënduar. /Paparaci.com/
