Sekretari i Përgjithshëm i NATO-s, Jens Stoltenberg, pas vizitës që pati në Kosovë të hënën, këtë të martë do të qëndrojë në Serbi.
Ai do të pritet në Beograd nga presidenti serb, Aleksandar Vuçiq dhe më pas edhe kryeministrja Ana Bërnabiq.
Takimi Stoltenberg-Vuçiq do të nisë në 09:30, derisa pastaj do të ketë një konferencë për media.
Para Kosovës, Stoltenberg qëndroi në Bosnje e Hercegovinë, ku u takua me krerët shtetërorë dhe përfaqësuesin e lartë ndërkombëtar, Christian Schmidt.
Vizita e Stoltenbergut në rajon vjen mes paralajmërimeve nga Ukraina se Rusia synon të nxisë konflikt mes shteteve të Ballkanit Perëndimor.
Më 22 nëntor ai do të përmbyllë turneun ballkanik me një takim me udhëheqësit e shteteve anëtare të NATO-s nga rajoni. Ai do të takohet me kryeministrin shqiptar, Edi Rama, presidentin kroat, Zoran Millatoviq, kryeministrin e Malit të Zi, Millojko Spajiq dhe me atë të Sllovenisë, Robert Golob.
