Ka filluar gjyqi presidentit të entitetit të Republikës Sërpska, Millorad Dodik.
Ai tashmë ka hyrë në Gjykatën e Bosnjës dhe Hercegovinës (BiH).
Kreu i SNSD-së ka hyrë me makinë në Gjykatën e Bosnjë-Hercegovinës nga ana e poshtme e gjykatës, pra nuk ka shfrytëzuar hyrjen zyrtare që hyhet normalisht.
Në gusht, Prokuroria e Bosnjës dhe Hercegovinës ngriti aktakuzë kundër Dodikut dhe kundër drejtorit të gazetës zyrtare të Republikës Sërpska, Millosh Lukiq, për moszbatimin e vendimeve të përfaqësuesit të lartë në Bosnje e Hercegovinë, Christian Schmidt.
Aktakuza ndaj tyre u ndryshua dhe u konfirmua pastaj më 11 shtator.
Avokatët e Dodikut dhe Lukiqit në kundërshtimet e tyre deklaruan se “vepra penale për të cilën akuzohet Dodiku nuk ekziston, sepse Schmidt është i paligjshëm”.
Më 9 tetor, Gjykata e BiH konfirmoi për Radion Evropa e Lirë se i ka hedhur poshtë si të pabaza kundërshtimet e mbrojtjes.
Mbrojtjes iu refuzuan dy kërkesa për përjashtimin e gjyqtares Jasmine Dedoviq Qosiq, e cila ka konfirmuar aktakuzën dhe më pas ka refuzuar kundërshtimet.
Në qershor, Asambleja Kombëtare e Republikës Sërpska miratoi ligje në lidhje me mospublikimin e vendimeve të Përfaqësuesit të Lartë dhe moszbatimin e vendimeve të Gjykatës Kushtetuese të Bosnjës dhe Hercegovinës.
Përfaqësuesi i Lartë Schmidt më pas vendosi t’i shfuqizojë ato.
Dodik nënshkroi dekretin për hyrjen në fuqi të këtyre ligjeve dhe Lukiq i publikoi ato në Gazetën Zyrtare të Republikën Sërpska.
Kur e shfuqizoi ligjin e Republikës Sërpska, Schmidti vendosi ndryshime në Kodin Penal të Bosnjë dhe Hercegovinës, sipas të cilit mosrespektimi i vendimeve të Përfaqësuesit të Lartë është vepër penale.
