Ambasadori gjerman në Kosovë, John Rohde, s’e ka komentuar nëse BE-ja duhet të vendosë sanksione ndaj Serbisë, pas sulmit të fundit në Kosovë.
“Jam këtu për të folur për viza, jo për politikë. Dua të jem pozitiv sot”, ka thënë ai, në kampanjën informuese për liberalizimin e vizave.
Rohde tha se kjo kampanjë, e cila ka filluar të enjten dhe do të vazhdojë edhe për dy muaj në gjithë Kosovën, është e mrekullueshme.
Tutje, Rohde shtoi se dëshiron të shohë sa më shumë kosovarë në Gjermani, vitin e ardhshëm.
“Është e mrekullueshme që Qeveria ka nisur këtë kampanjë informuese për liberalizimin e vizave, i cili tashmë ka ndodhur”.
“E kam thënë edhe para një viti, unë do të jem ambasadori i fundit gjerman që do të duhet ta pyesni për viza. 1 janari 2024 është një ditë e mrekullueshme për Kosovën, por edhe për ambasadën. Liberalizimi i vizave do të duhej të ndodhte që moti”.
“Vitin e ardhshëm mbahet kampionati evropian në futboll, në Gjermani, dhe dua sa më shumë kosovarë atje që t’i bashkëngjiten këtij kampionati”, ka thënë Rohde.
