Kryeministri i Republikës së Kosovës, Albin Kurti, mori pjesë mbrëmë dhe ndau çmimin kryesor “Vjosa Berisha” për filmin më të mirë Ballkanik, në ceremoninë e ndarjes së çmimeve në edicionin e 15-të të PriFest që u mbajt në Sheshin “Zahir Pajaziti”, në Prishtinë.
Në edicionin e 15-të këtij festivali, Kryeministri Kurti përgëzoi organizatorët dhe vullnetarët, artistët dhe artdashësit, autorët dhe spektatorët që po e mirëmbajnë kaq të veçantë dhe madhështor “PriFestin”.
Ai para se të ndante çmimin për filmin më të mirë Ballkanik u shpreh se “Zelli, kreativiteti dhe mirësia e Vjosa Berishës, nuk kishte çmim, mirëpo ky festival tash e ka një çmim me emrin e Vjosa Berishës për filmin më të mirë Ballkanik”, dhe shtoi se në një konkurrencë impresive fituesit për çmimin më të mirë filmi Ballkanik “Vjosa Berisha”, janë dy filma: “Hyjnesha e Kuqe”, ndahet mes filmave “Toka brenda meje” nga Fisnik Maxville, Kosovë/Zvicër, dhe “Blaga’s Lessons” nga Stephan Komandarev, Bullgari.
Fjala e plotë e Kryeministrit Kurti:
Mirëmbrëma të gjithëve,
Më lejoni që të përgëzojë organizatorët dhe vullnetarët, artistët dhe artdashësit, autorët dhe spektatorët që po e mirëmbajnë kaq të veçantë dhe madhështor “PriFestin”, edhe tani që Vjosa Berisha nuk është më me ne, edhe tani që Vjosa Berisha është me ne.
Zelli, kreativiteti dhe mirësia e Vjosa Berishës, nuk kishte çmim, mirëpo ky festival tash e ka një çmim me emrin e Vjosa Berishës për filmin më të mirë Ballkanik, dhe në një konkurrencë impresive fituesit për çmimin më të mirë filmi Ballkanik “Vjosa Berisha” janë dy filma. Pra, “Hyjnesha e Kuqe” ndahet mes filmave “Toka brenda meje” nga Fisnik Maxville, Kosovë/Zvicër, dhe “Blaga’s Lessons” nga Stephan Komandarev, Bullgari.
