Mosmarrëveshjet për shërbime të ndryshme e pagesa nëpër kompanitë vendore janë jo fort të rralla dhe në shumicën prej këtyre rasteve përfshihen klientët dhe menaxhmenti. Një rast i tillë ka ndodhur sot ën mëngjes, në pikën e pompës së derivateve ‘Hib” në fshatin Bresje, raporton Gazeta Sinjali.
Burimet brenda Prokurorisë kanë bërë me dije se menaxherja e kësaj pompe e ka denoncuar një rast të kanosjes në Polici, pasi ishte përballur me një kliente, e cila e ka kërcënuar seriozisht.
Siç merr vesh Sinjali, bëhet fjalë për një kliente, të dyshuarën V.H., e cila sipas informacioneve të para, e ka kanosur menaxheren e pompës me fjalët “Do të të vras”.
Të njëjtat burim thonë se motiv i gjithë rastit dyshohet të jetë një debat mes tyre për shkak të një pagese.
Posa rasti është denoncuar në Polici, e dyshuara është shoqëruar në stacion policor për intervistim, ku ka dhënë deklaratën e saj lidhur me atë që ka ndodhur.
Ndaj saj, pas përfundimit të procedurave policore, Prokurori i Shtetit ka urdhëruar masën e ndalimit policor dhe inicimin e rastit për veprën penale “Kanosje”.
