Kancelari i Gjermanisë, Olaf Scholz e ka postuar një foto të tij në stilin pirat me një njollë të zezë në sy dhe mavijosje në të kuqe të errët në anën e djathtë të fytyrës – rezultat i një rrëzimi në fundjavë.
Ai e ka marrë me sportivitet lëndimin, duke shkruar në rrjetet sociale se mezi pret t’i shoh memet (talljet që bëhen të famshme në internet, zakonisht duke e përcjellë një fotografi me një përshkrim jashtë kontekstit).
“Mezi pres t’i shoh memet”, shkroi Szholz.
Si për ta shmangur çdo shqetësim të mundshëm për shëndetin e tij, në foto Scholz buzëqeshi lehtë dhe shkroi në X: “Faleminderit për urimet, duket më keq se sa është!”.
Scholz u rrëzua ndërsa po vraponte të shtunën dhe pësoi mavijosje në fytyrë, që e shtynë atë t’i anulonte disa takime në fundjavë.
