Gjykata Themelore e Prishtinës përmes një komunikate për media ka bërë të ditur për caktimin e masës së paraburgimit prej 30 ditësh ndaj tre të dyshuarve për dallavere me rezervat e shtetit, shkruan Express.
Gjykata në njoftim ka sqaruar se dy zyrtarët e MINT dyshohen se kanë kryer veprën penale keqpërdorim i pozitës apo autoritetit zyrtare, derisa Ridvan Muharremi dyshohet se ka kryer veprën dhënia e ndihmës në kryerjen e veprës penale të keqpërdorimit të pozitës apo autoritetit zyrtar.
“Gjykata Themelore në Prishtinë, Departamenti Special ka vendosur lidhur me kërkesën e Prokurorisë Speciale të Republikës së Kosovës, për caktimin e masës së paraburgimit në çështjen penale për të pandehurit I.L dhe H.G për shkak të dyshimit të bazuar se kanë kryer veprën penale Keqpërdorimi i pozitës apo autoritetit zyrtar, nga neni 414 të Kodit Penal të Republikës së Kosovës dhe i pandehuri R.M për shkak të dyshimit të bazuar se ka kryer veprën penale Dhënia e ndihmës në kryerje të veprës penale të keqpërdorimit të pozitës apo autoritetit zyrtar, nga neni 414 lidhur me nenin 33 të Kodit nr. 06/L-074 Penal të Republikës së Kosovës”, thuhet në njoftim.
“Gjyqtarja e Procedurës Paraprake e ka aprovuar si të bazuar kërkesën e ProkurorisëSpeciale të Republikës së Kosovës, për caktimin e masës së paraburgimit për të pandehurit I.L, H.G dhe R.M, të njëjtëve iu ka caktuar masën e paraburgimit në kohëzgjatje prej 1 (një) muaji, për secilin. Masa e paraburgimit tre të pandehurve iu është caktuar në harmoni me nenin 184 paragrafi 1 nën paragrafi 1.1 e 1.2 pika 1.2.2 e1.2.3, të Kodit të Procedurës Penale të Kosovës”, theksohet në njoftim, raporton Express.
Në fund, Gjykata ka sqaruar se kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë
