Sekretari i përgjithshëm i NATO-s, Jens Stoltenberg kërkoi të martën nga Gjermania të investojë më shumë në mbrojtje, duke prekur kështu temat e ndjeshme të politikës gjermane , e cila po ashtu ka sjellë deri te përkeqësimi i marrëdhënieve me SHBA-të.
“Për mua është me rëndësi vendimtare që SHBA dhe Gjermania të pajtohen se duhet të investojnë më shumë në sigurinë tonë”, theksoi ish-kryeministri norvegjez në një intervistë për gazetën gjermane “Handelsblatt”.
Shefat e vendeve anëtare të Aleancës janë pajtuar më 2014 rreth shtimit të investimeve në ushtri prej dy për qind të bruto prodhimit vendor, por presidenti amerikan Donald Trump u ankua se aleatët e SHBA-ve nuk po paguajnë mjaftueshëm për mbrojtjen amerikane.
“Kur bëhet fjalë për shtimin e buxhetit ushtarak, këtu nuk bëhet fjalë që të kënaqen SHBA-të. Këtu bëhet fjalë për sigurinë evropiane. Evropa është më afër krizave se sa SHBA, është më afër Rusisë, Sirisë dhe Irakut”, tha Stoltenberg.
Vetëm pesë shtete- SHBA, Britania, Greqia, Polonia dhe Estonia aktualisht përmbushin ndarjen e dy për qind të bruto prodhimit vendor për ushtrinë, derisa Gjermania investon vetëm 1,2 për qind në ushtri.
Trump ka theksuar se Gjermania i ka borxhe të mëdha SHBA-ve dhe NATO-s për mbrojtjen amerikane, transmeton agjencia AFP.
