Anëtarja e bordit të Komisionit të Pavarur të Mediave (KPM), Luljeta Aliu, e cila njihet për qëndrime të përafërta me partinë në pushtet, ka kritikuar gazetarët që po e kundërshtojnë mbylljen e Klan Kosovës.
Aliu, me anë të një postimi në ‘Facebook’, ka “këshilluar” gazetarët që t’i denoncojnë, siç tha ajo, keqbërësit.
“Nuk e kuptoj pse duhet njerëzit tanë me u solidarizu mes vete vetëm për shkak të profesionit të njëjtë. Mësuesit, gjyqtarët, prokurorët, policët e kështu me radhë, zakonisht e mbrojnë njëri-tjetrin pa marrë parasysh shkeljet që mund t’i bëjnë”, ka shkruar ajo.
“Nuk mbrohet profesioni duke mbrojtë shkeljet e dikujt, kushdoqoftë ai/ajo. Kjo nuk është shenjë kolegialiteti, por bashkëpunim në keqbërje. Profesioni mbrohet duke i denoncuar keqbërësit, duke mbrojtur ligjet dhe rregulloret e profesionit”, vijon postimi i saj.
“Para se ta mbroni dikë, para se të merrni vendime, mendohuni se cili është fitimi e cili dëmi që pason nga ato vendime/sjellje tuaja. E njëjta vlen edhe për mediet”.
Aliu edhe kësaj radhe qëndron në një linjë me Lëvizjen Vetëvendosje, ku lideri i saj mbrëmë tha se janë edhe 468 media të tjera të regjistruara si biznese.
Ai tha se shteti, duke i zbatuar rregullat e tilla “kundër një shkelësi të vetëm, nuk kërcënon pluralizmin mediatik”.
