Dhjetë vjet të jetës se tyre ia kushtuan punës si infermierë në Qendrën e Mjekësisë Familjare në Ferizaj.
Megjithëse të punësuar nga organizata shëndetësore Caritas, dy infermierë janë të dëshpëruar me punëdhënësin e tyre.
Ata mbetën të papunë.
Në një rrëfim për Kiksin, ankesat e tyre u drejtuan kundrejt qendrës dhe menaxherit të kontratave Caritas në këtë qendër.
Zhgënjimi i tyre u rrit kur kuptuan se kontratat e reja iu bënë infermiereve pa përvojë punë.
Sipas ish-punëtorëve, të cilët punuan afër një dekadë në këtë qendër, në grupin e ri të të përzgjedhurve të këtij projekti, u thirrën punëtorë, përvoja e disa prej të cilëve ishte vetëm disamujore, por jo edhe ata të cilët përvojë pune kishin deri në 10 vjet.
Një gjë të tillë e pranon menaxheri i kontratave Caritas në këtë qendër, Xhevdet Haxhidema.
Por Haxhidema thotë se qendra, kërkesën në Caritas e dërgoi në bazë të profileve të të cilëve ata si qendër patën nevojë.
Për Kiksin, Haxhidema mohon në mënyrë të prerë të ketë pasur ndikim në përzgjedhjen e punëtorëve nga Caritasi.
Ish-punëtorët në këtë qendër ankesa patën edhe sa u përket kontratave.
Sipas tyre, kontratat i nënshkruanin vetëm pak muaj para se t’u mbaronte ajo edhe pse ata kishin punuar për 2 vjet.
Për KIKS-in, në mënyrë anonime, ata rrëfyen që në atë mënyrë puna e tyre bëhej pa kontratë dhe ndiheshin të pasigurt, në rast se do t’u ndodhte diçka, sidomos gjatë periudhës së pandemisë.
Një gjë të tillë e mohon menaxheri i këtyre kontratave në QKMF në Ferizaj.
Haxhidema tha se ndonjë mungesë mund të ketë ndodhur gjatë periudhës së pandemisë për shkak të situatës së pazakontë, por asnjëherë tjetër.
Mungesa e pagës mujore ishte problemi tjetër, me të cilin ishin përballur punëtorët shëndetësorë me kontratë Caritas.
Sipas tyre, mungesa e pagave ndonjëherë arrinte deri në gjashtë muaj dhe si pasojë e kësaj ata detyroheshin që, edhe pse të punësuar, të zhyteshin në borxhe.
Problematikën e mungesës së pagave e pranon edhe vetë menaxheri Haxhidema.
Për KIKS-in, ai tha se në kohën kur komuna kishte kriza financiare, pësonin këta punëtorë, pasi që financimi i tyre vinte nga komuna.
