Ish-komandanti i Zonës Operative të Llapit, Rrustem Mustafa, po ofron dëshminë e tij për rastin Thaçi dhe të tjerët në Gjykatën Speciale për të dytën ditë radhazi.
Mustafa është duke u pyetur nga Prokuroria Speciale se sa shpesh ka pasur kontakte me Shtabin e Përgjithshëm të Ushtrisë Çlirimtare të Kosovës, shkruan Gazeta Insajderi.
“Remi” ka mohuar të ketë pasur komunikime të rregullta me ta. Për këtë, Prokuroria e ka prezantuar me librin “Kthesa e Madhe” me autor ish-kryekuvendarin Jakup Krasniqi, dikur zëdhënës i UÇK-së.
Në libër, siç e citon Prokuroria, shkruhet se Zona Operative e Llapit kishte komunikime të përditshme me Shtabin e Përgjithshëm.
“Dua ta paraqesim në ekran një dokument. Është një libër i botuar nga Jakup Krasniqi në 2006. Bëhet fjalë për një vizitë në zonën e Llapit dhe Shalës në tetor të 98-ës. “Shkuam në këtë zonë për ta parë në terren se cila ishte situata pas ofenzivës. Kemi marrë disa informata të përgjithshme në situata nga telefonatat e përditshme”. A është e saktë, ishit në kontakte të rregullta me Shtabin e Përgjithshëm?”, pyetet “Remi” nga Prokuroria.
Komunikimi i Prokurorit me “Remin”:
Remi: Mund të jetë pas shtatorit, ofensivës… [s’dëgjohet]
Prokuroria: Ku i mbanit telefonat e komandës?
Remi: Telefonat i mbanim në komandë.
Prokuroria: Kush kishte të drejtë t’i përdorte ato qasje në ta
Remi: Kanë qenë komandantë të brigadave, kanë leju edhe të tjerë sepse kushtonin shtrenjtë, është dashtë me qenë numri i kufizuar i atyre që duhet ta përdorin.
Prokuroria: Po shtabit të përgjithshëm i dhatë pajisje të këtilla komunikimi?
Remi: I kom ofru dy radio-lidhje por nuk më kujtohet që kemi komuniku përmes tyre me shtabin e përgjithshëm.
Prokuroria: A do të ishte e saktë të thoshin që zona e Llapit kishte kontakte të rregullta me shtabin e përgjithshëm.
Remi: Unë kom pasë kontakte, sa herë që kom mujtë me i marrë në telefon jemi dëgju, por të rregullta nuk mund të them.
Prokuroria: Do të filloj me pjesën tre, faqja pesë – ju thatë se nuk kishit kontakt të rregullta.
Remi: Është e njëjta që thashë edhe tani, po më duket.
Prokuroria: Dua ta paraqesim në ekran një dokument. Është një libër i botuar nga Jakup Krasniqi në 2006. Bëhet fjalë për një vizitë në zonën e Llapit dhe Shalës në tetor të 98-ës. “Shkuam në këtë zonë për ta parë në terren se cila ishte situata pas ofenzivës. Kemi marrë disa informata të përgjithshme në situata nga telefonatat e përditshme”. A është e saktë, ishit në kontakte të rregullta me Shtabin e Përgjithshëm?
Remi: Ne kemi pasur kontakt vazhdimisht, por të rregullta varet se si e kupton. Ne jemi përpjekë me pasë kontakte të përhershme me Shtabin e UÇK-së.
