Kryeministri i Kosovës, Albin Kurti, ka kujtuar Betejën e Morinës në përvjetorin e 25-të të kësaj beteje të lavdishme.
Sipas tij, ajo ishte një betejë shumë e ashpër që ndodhi plot 25 vite më parë, në një kohë aq të vështirë, në muajt e parë të luftës në Kosovë, kur mobilizimi, furnizimi dhe organizimi i Ushtrisë Çlirimtare të Kosovës ishte sfida kryesore e kohës.
“Një korridor i tillë nëpërmjet të cilit furnizohej me armë UÇK-ja, kalonte nëpër fshatin Morinë të Gjakovës, prej nga ushtarë çlirimtarë nga treva të ndryshme të Kosovës, fusnin armë nga Shqipëria në Kosovë”, ka shkruar Kurti në Facebook.
“Që nga 3 maji i vitit 1998 kur nisën luftimet në Ponoshec dhe 13 qershori kur forcat serbe ndërmorën një ofensivë të gjerë për ta marrë nën kontrollën e tyre Morinën, ushtarët e UÇK-së u shkaktuan humbje forcave të Serbisë në balance prej dhjetëra pjesëtarësh. Më 7 korrik 1998, gjatë luftimeve të betejës së Morinës, në Rekë të Keqe të Malësisë së Gjakovës, ranë dëshmorë si luftëtarë lirie: Muhamet Ukshini, Arben Ukshini, Blerim Ukshini, Shkelzen Syla, Sylejmon Abdyli, Fisnik Salihu, Ymer Bytyqi, Nezir Elezaj dhe Ahmet Pulatani”, ka thënë ai tutje.
