Instituti Kosovar për Kërkime dhe Zhvillim të Politikave (KIPRED) organizon një tryezë të rrumbullakët lidhur me monitorimin e sektorit të sigurisë së Kosovës në të cilën do të prezantohen dhe diskutohen të gjeturat e monitorimit të përmbledhura në edicionin e gjashtë të Observerit të Sektorit të Sigurisë së Kosovës.
Numri i gjashtë i vëllimit të parë të Observerit të Sektorit të Sigurisë së Kosovës (OSSK) trajton në mënyrë analitike çështjet kyçe të sektorit të punëve të brendshme, të inteligjencës dhe të Forcave të Sigurisë, që e kanë mbizotëruar debatin publik dhe mbikëqyrjen parlamentare të këtyre sektorëve gjatë periudhës 15 nëntor 2016 – 15 shkurt 2017.
Në një punim të veçantë të analizës së politikave publike, OSSK-ja trajton, po ashtu, edhe mundësitë për ndërtimin e masave të mirëbesimit në fushën e sigurisë midis Kosovës dhe Serbisë, si dhe prezanton rezultatet e hulumtimit të opinionit publik lidhur me besimin sa i përket çështjeve të sigurisë, në institucionet përkatëse qeveritare dhe në krerët e tyre, si dhe në komisionet përkatëse parlamentare.
Ky projekt është financuar nga projekti Promovimi i Shoqërisë Demokratike (DSP) – i financuar nga Zyra Zvicerane për Bashkëpunim në Kosovë (SCO‐K) dhe menaxhuar nga Fondacioni Kosovar për Shoqëri Civile (KCSF).
