Sipas kryetarit të Dumës së Shtetit të Rusisë, Vyacheslav Volodin, veprimet e presidentit francez, Emmanuel Macron, shkaktuan procese të vetëshkatërrimit në një shtet dikur të fortë dhe të qëndrueshëm, pasi Franca tani është në “prag të një lufte civile”.
Në një deklaratë në Telegram, Volodin tha se Macron tani po përpiqet të ridrejtojë vëmendjen e qytetarëve francezë larg “gabimeve të tij në politikën e brendshme” dhe drejt çështjeve ndërkombëtare.
“Besimi tek Macron po gërryhet. Vlerësimet kanë rënë në pikën më të ulët dhe nëse zgjedhjet presidenciale do të mbaheshin pikërisht tani, Marine Le Pen (kryetarja e partisë Tubimi Kombëtar) do të fitonte”, tha Volodin.
Sipas tij, Franca po rezulton të jetë në “prag të një lufte civile” dhe arsyeja e paqëndrueshmërisë është “politika aktuale e presidentit për monopol politik” dhe reduktimi i rolit të sindikatave në vitet e fundit që tradicionalisht kanë luajtur një rol të rëndësishëm në vend”.
Ai gjithashtu pretendoi se Macron vazhdimisht po dobëson sistemin e partive politike, duke “i larguar gaullistët dhe socialistët” nga arena politike.
“E gjithë kjo rezultoi që problemet të diskutoheshin në rrugë dhe jo në parlament. Njerëzit filluan të mbrojnë interesat e tyre në mënyra shumë të ndryshme kur nuk shihnin përfaqësuesit e tyre në pushtet. Në këtë formë, situata vetëm do të përkeqësohet”, tha Volodin.
Javën e kaluar, 17-vjeçari Nahel M. me origjinë algjeriane, u qëllua nga një oficer policie në periferi të kryeqytetit Paris.
Pas vrasjes fatale të adoleshentit gjatë një kontrolli trafiku, protestat kanë përfshirë mbarë Francën.
Oficeri po përballet me një hetim formal për vrasje me dashje dhe është vendosur në paraburgim. /Abc news
