Refuzimi i Kurtit që ta takojë Ramën – reagon ashpër Çitaku: Marrëzi!

Nënkryetarja e PDK-së, Vlora Çitaku ka komentuar kushtet e kryeministrit Kurti për t’u takuar me kryeministrin e Shqipërisë, Edi Rama.

Çitaku përmes një shkrimi në “Facebook” thotë se kjo është marrëzi, teksa shton se “Vuçiçin e takon pa kushte, e Ramës i vendosë kushte”.

“Kryeministër, Kosova nuk është lodër. Qeverisja nuk është lojë fëmijësh. Lëri inatet, mllefet e hatërmbetjet personale”, shkroi tutje.

Kryeministri Edi Rama pritet të zhvillojë në datat 6 dhe 7 korrik një tur në Ballkan, ku do të zhvillojë takime me krerët e qeverive të këtij rajoni.

Për këtë kryeministri Albin Kurti tha se i ka kërkuar kryeministrit Edi Rama, që të mbahet mbledhja ndërmjet dy qeverive.

Kurti ka folur edhe për procesin e Berlinit, ku tha se nuk ka lider në Ballkan që e ka mbështetur më shumë se ai.

Megjithatë, Kurti ka shprehur gatishmëri ta takojë Ramën, vetëm në kuadër të mbledhjes së dy qeverive. “Unë jam në kontakt me kryeministrin Edi Rama, e di që do të vij për një vizitë, dhe unë miqësisht i kam kërkuar Ramës që nëse vijë ta mbajmë edhe mbledhjen e dy qeverive. Unë i kam propozuar kryeministrit Rama që meqë po vjen këtë javë ta mbajmë edhe një mbledhje të dy qeverive dhe t’i nënshkruajmë ato marrëveshje”, ka thënë Kurti.