Rebelimi i ndërprerë i grupit mercenar rus Wagner në fundjavë, e ka demonstruar shkallën e gabimit strategjik të Kremlinit kur e ka nisur luftën në Ukrainë, ka thënë Sekretari i Përgjithshëm i NATO-s, Jens Stoltenberg, të hënën.
Rusia ka tentuar të rikthejë qetësinë të hënën, pasi luftëtarët e Wagnerit e kanë ndërprerë avancimin drejt Moskës, janë larguar prej qytetit të kapur rus Rostov-on-Don dhe janë nisur drejt bazave të tyre në orët e vona të së shtunës, pas arritjes së një marrëveshjeje që u garanton siguri.
Sipas marrëveshjes – të ndërmjetësuar nga lideri bjellorus, Alexander Lukashenka – komandanti i tyre, Yevgeny Prigozhin, duhet të shkojë në Bjellorusi.
“Ngjarjet e fundjavës janë një çështje e brendshme dhe një tjetër demonstrim i një gabimi të madh strategjik që presidenti [Vladimir] Putin e ka bërë kur e ka nisur aneksimin e Krimesë dhe luftën në Ukrainë”, ka thënë Stoltenberg nga Vilniusi, kryeqyteti i Lituanisë.
Konfuzioni për ngjarjet e jashtëzakonshme të fundjavës i ka lënë qeveritë e Perëndimit në kërkim të përgjigjeve se çfarë mund të ndodhë në këtë shtet me arsenal të fuqishëm bërthamor – dhe me luftën që vazhdon të zhvillohet në Ukrainë.
Rostov-on-Don, Rusi, 24 qershor 2023. Ky qytet u pushtua dhe më pas u braktis nga luftëtarët mercenarë të grupit Wagner.
Stoltebergu ka thënë se NATO-ja është duke e monitoruar situatën në Bjellorusi dhe e ka dënuar vendimin e Moskës për të dërguar armë bërthamore atje.
“Ne nuk kemi parë shenja që Rusia është duke u përgatitur për t’i përdorur armët bërthamore, mirëpo NATO-ja mbetet vigjilente”, ka thënë Stoltenberg, duke shtuar se mbrojtja e NATO-s është mjaftueshëm e fuqishme për t’i mbajtur njerëzit të sigurt “në një botë të rrezikshme”
Në të njëjtën kohë, Stoltebergu e ka ritheksuar mbështetjen e vazhdueshme të NATO-s për Kievin.
“Nëse Rusia mendon se mund të na frikësojë nga ofrimi i ndihmës në Ukrainë, do të dështojë”, ka thënë ai.
“Ne do të jemi afër Ukrainës sa të ketë nevojë”.
Stoltenberg ka qenë në Lituani për t’i parë nga afërt stërvitjet e NATO-s.
Ai ka thënë se stërvitjet dërgojnë mesazh të qartë se NATO-ja është e gatshme të mbrojë çdo inç të aleancës.
Lufta në Ukrainë ka nisur më 24 shkurt 2022.
Presidenti rus, Vladimir Putin, e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
