Kryeministri Albin Kurti tha se ndërkombëtarët kanë garantuar më 17 mars, një ditë para takimit me presidentin serb, Aleksandar Vuçiq në Ohër, se nëse ka dakordim për aneksin e zbatimit të marrëveshjes, Lista Serbe do të merrte pjesë në zgjedhje.
“Një ditë para se të shkojmë në Ohër për atë aneksin e zbatimit, neve faktorët ndërkombëtarë na kanë premtuar: nëse bëhet aneksi i zbatimit në Ohër, ne ju garantojmë që Lista Serbe merr pjesë në zgjedhje”, tha Kurti në një konferencë për media, pas mbledhjes së Këshillit të Sigurisë.
“Unë kam qenë i gatshëm që Lista Serbe me marrë pjesë në zgjedhje, përkundër asaj çka kanë thënë për mua e çka i kanë bërë Republikës tonë politikanët e Listës Serbe. Unë kam qenë i gatshëm”, tha ai.
Kurti tha se përkundër zgjatjes së afatit të regjistrimit të partive për të garuar në zgjedhjet e parakohshme në katër komunat veriore, Lista Serbe nuk aplikoi.
“Dhe a e dini çka ka ndodh? Zgjatet për 5 ditë afati i regjistrimit, prej 17 mars në 22 mars. Nëse duan të marrin pjesë, pse jo. Ju ka kaluar afatin, po e zgjasim. Ne e bëjmë aneksin e zbatimit në Ohër më 18 mars, më 19, 20, 21, 22 mars, Lista Serbe nuk aplikon për t’u regjistruar. Çfarë të bëjmë ne tash? S’mund t’i marrim Listën Serbe me dhunë të garojnë në zgjedhje. Faktorët ndërkombëtarë na kanë premtuar se ata e sigurojnë këtë gjë. Prandaj e kemi zgjatur afatin dhe është bërë aneksi i zbatimit”, tha Kurti.
