Mësimdhënësi nga Deçani i cili po dyshohet për sulm seksual ndaj një të miture, e ka mohuar ta ketë kryer këtë vepër.
Një video-incizim i publikuar në media ditëve të fundit, tregon një moment ku mësimdhënësi shihet duke e puthur një nxënëse, vajzë e mitur.
Edhe kjo e fundit, sipas dosjes së prokurorisë, ka deklaruar në stacionin policor se i dyshuari V.S. e ka puthur në buzë atë dy herë, pa pëlqimin e saj.
Ndërsa i dyshuari, V.S. në deklaratën e tij e pranon që është mësimdhënës i viktimës, se ka qenë në dijeni të moshës së saj, por veprimet e tij kanë qenë vetëm duke e përkëdhelur dhe duke iu vendosur dorën në kokë dhe se i njëjti e ka afruar afër vetit për disa sekonda, tek faqja.
I dyshuari V.S, e ka mohuar sulmin seksual, por që sipas dosjes së prokurorisë, kjo është bërë me qëllim të ikjes nga përgjegjësia penale, ngase video-incizimi i kësaj ngjarjeje e vërteton të kundërtën.
Për këtë rast, Prokuroria themelore në Pejë ka bërë kërkesën për caktimin e masës së paraburgimit për mësimdhënësin në fjalë nën dyshimin se ai ka kryer dy vepra penale sulm seksual dhe kanosje.
Sipas dosjes së prokurorisë, i dyshuari V.S., dyshohet po ashtu se ka kanosur edhe personin apo dëshmitarin që e ka bërë video-incizimin e rastit në fjalë.
Këtë të fundit, dosja e prokurorisë tregon se i dyshuari e kishte vërejtur se e kishte bërë video-incizimin dhe se i njëjti e kishte kanosur duke iu drejtuar me fjalët ‘’Ta shkatërroj edhe familjen’’.
Sipas dëshmitarit që ka bërë video-incizimin e ngjarjes në fjalë, i dyshuari V.S. paraprakisht edhe me datën 8 qershor 2023, e kishte puthur viktimën dhe se i njëjti e kishte incizuar.
Të dyshuarit, sipas dosjes së prokurorisë i është bërë edhe sekuestrimi i përkohshëm i sendeve.
Zëdhënësi i prokurorisë themelore në Pejë, ditën e djeshme ka konfirmuar për Kallxo.com se prokurori i shtetit ka marrë veprime hetimore për ndriçimin e plotë të kësaj çështjeje.
“Prokurori ka shkuar në stacionin policor dhe ka urdhëruar sekuestrimin e telefonit të të pandehurit” – ka thënë dje zëdhënësi për KALLXO.com.
Në anën tjetër, mësimdhënësi është suspenduar edhe nga puna.
Këtë për KALLXO.com, e ka bërë të ditur kryetari i Komunës së Deçanit, Bashkim Ramosaj, i cili ka konfirmuar se rasti ka ndodhur të premten.
“Është një rast që na ka tronditur për nga natyra për shkak të respektit që e kanë pasur banorët për atë mësimdhënës, dhe nuk e di çka ka mujtë m’i ndodhë. Mirëpo është rast që na ka tronditur të gjithëve” – ka thënë Ramosaj.
Kryetari ka theksuar se menjëherë pas raportimit është marrë masa për suspendimin e mësimdhënësit deri sa të verifikohen procedurat e hetuesisë.
Ai gjithashtu ka bërë të ditur se drejtori i shkollës dhe drejtori i Arsimit e kanë denoncuar mësimdhënësin.
