Pas shumë spekulimesh rreth ngjarjes së lansimit të telefonit të ri që paloset, Samsungu më në fund ka konfirmuar disa detaje për lansimin.
“Galaxy Unpacked” do të mbahet në fund të korrikut, ka njoftuar kompania. Për herë të parë, ngjarja do të organizohet në Seul të Koresë së Jugut. Për dallim nga organizimet e shkuara, sivjet pritet që fokusi të jetë në pajisjet që palosen.
“Kategoria e pajisjeve që palosen mishëron filozofinë e Samsungut për inovacion, që shtyn kufijtë për të definuar të ardhmen”, ka thënë presidenti i Samsungut, TM Roh.
Samsungu ka vlerësuar se organizimi i kësaj ngjarje në Seul ka vlerë të madhe si për qytetin ashtu edhe për kategorinë e pajisjeve që palosen.
Më herët është raportuar se kjo ngjarje do të mbahet më 26 korrik.
Në këtë ngjarje pritet të lansohet telefoni i ri palosës i kompanisë, Z Flip 5.
Po ashtu pritet të lansohen tabletet e reja, kufjet dhe ora e re e mençur.
