Kryeministri i Republikës së Kosovës, Albin Kurti, në një paraqitje para mediave ka folur për vendimin e dy kryetarëve të komunave veriore nga Partia Demokratike e Kosovës të cilët s’janë duke dalë në punë në objektet e Komunave, veprim ky që është në përputhje edhe me kërkesën ndërkombëtare.
Kurti ka thënë se beson që kryetarët duhet të jenë në ndërtesa publike të Komunave, meqë s’ka ndonjë gjendje të jashtëzakonshme.
Megjithatë ka thënë se janë kryetarët ata që i kanë marrë votat e qytetarëve dhe se ata i marrin vendimet siç gjykojnë vetë.
“Unë besoj që kryetarët e zgjedhur, ndonëse dalja ka qenë e ulët, janë kryetar legal që kanë legjitimitet, ndonëse jo të plotë, shkak i trysnisë së Serbisë. Tash ata kandidat që kanë garuar e fituar duhet ta bëjnë punën, dhe unë besoj që vendi i punës së kryetarit duhet të jetë në ndërtesën publike të komunës, sepse ndërtesa publike e Komunës është ndërtesa e republikës.
Ka gjendje të jashtëzakonshme si ajo me pandemi, kur edhe ne s’kemi qenë në vende pune, por vendi i punës së kryetarit të jetë në atë ndërtesë dhe unë besoj që është mirë që të gjithë të jenë atje. Mirëpo është kryetari që i ka marrë votat e qytetarëve, natyrisht që është kryetar, dhe i marrin vendimet për të cilat gjykojnë kryetarët.
Kur kanë hyrë këta kryetrarë në zyre, ato zyre kanë qenë të zbrazura. Përveç që braktisen zgjedhjet dhe ndërtesat, mbajnë përgjegjësi për gjendjen e krijuar, jo ne që duam të punojmë dhe marrim pjesë në zgjedhje. S’mund të kenë përgjegjësi ata që marrin pjesë në mënyrë demokratike. Por ata të cilët bojkotojnë dhe kryejnë dhunë.Unë besoj që kryetarët e komunave duhet të jenë në zyrat e kryetarëve të komunave, s’ka nevojë për paralelizma.Cili është kuptimi që kemi ndërtesa publike për zyrtarë të shtetit nëse nuk shfrytëzohen”, ka thënë Kurti.
