Edvin Kuç është zgjedhur futbollisti më i mirë i xhiros së 35-të të Superligës së futbollit.
Mesfushori kreativ pati paraqitje të shkëlqyeshme në fundjavë për Ballkanin kundër Ferizajt, duke e shënuar golin e parë në fitoren 2:0, shkruan “Gazeta Express”.
Me këtë fitore Ballkani edhe zyrtarisht e siguroi titullin e kampionit për të dytin vit rresht.
Pasi e mori këtë çmim, Kuç u shpreh i lumtur që skuadra e tij e përmbushi me sukses misionin e saj për mbrojtjen e titullit të kampionit dhe atë një javë para mbylljes së kampionatit.
“Të shpallesh Ylli i Javës në xhiron kur edhe jemi rishpallur kampion për herë të dytë radhazi është një kënaqësi e veçantë. Si kapiten jam krenar me ekipin dhe me ecurinë që kemi treguar në këtë edicion. Rruga për ta mbrojtur titullin kampion nuk ka qenë e lehtë. Kemi pasur shumë ndeshje, kemi lëshuar shumë pikë rrugës, por në fund karakteri i skuadrës, puna e shtabit teknik dhe organizimi i mirë i klubit kanë bërë që sërish trofeu i kampionit të vijë në Suharekë. Këtë çmim por edhe titullin kampion ia dedikoj kryesisë, tifozëve dhe familjes tim, e cila çdo herë më ka qëndruar afër”, ka theksuar Edvin Kuç për faqen zyrtare të FFK-së.
