Tre persona kanë humbur jetën, pasi makina me të cilën ata udhëtonin, ra në liqenin e Bilecik. Ngjarja e rëndë ndodhi në Turqi, ndërsa policia ka vënë në pranga shoferin 36-vjeçar, Yunus K.
Viktimat janë një fëmijë dhe dy vajza. Ndërkohë, drejtuesi i arrestuar i mjetit deklaroi në polici se ata kishin konsumuar bonsai dhe metamfetaminë përpara aksidentit. Sipas mediave turke, aksidenti ka ndodhur rreth orës 04:00 të ditës së djeshme në lokacionin e fshatit Üyük Göller.
Yunus K. dhe shoku i tij Ertan U. arritën të dalin në kohë nga mjeti që po fundosej, por fatkeqësisht fëmija dhe dy vajzat që udhëtonin me ta nuk ia dolën dhe u mbytën.
Menjëherë pas marrjes së informacionit në vendin e ngjarjes shkuan një numër i madh zjarrfikësish, ekipet mjekësore dhe zhytësit, këta të fundit që pas disa minutash arritën të nxjerrin trupat e pajetë në breg.
Viktimat janë Derya Nur Mete, 24 vjeç, djali i saj 5-vjeçar Yüksel Berk Mete dhe Nazar Ağaçdelen 25 vjeç. Trupat e tyre janë dërguar në Institutin e Mjekësisë Ligjore të Bursës për procedurat e autopsisë.
Në këqyrjen e kryer nga ekspertët e grupit hetimor në makinën e aksidentuar, brenda saj u gjet një aparat për përdorimin e drogës i njohur si “kovë”. Për këtë arsye, shoferi përfundoi pas hekurave dhe akuzohet për vrasje, ndërsa shoku i tij pas marrjes në pyetje është lënë i lirë.
