Deputetja nga radhët e Partisë Demokratike të Kosovës, Blerta Deliu Kodra ka reaguar pas deklaratës së Kryeministrit të Kosovës, Albin Kurti i cili kërkoi nga emisari sllovak, Miroslav Lajçak, që Serbia të zbatojë gjithë marrëveshjen.
Në postimin e saj në Facebook, Deliu-Kodra ka thënë se Kurti e ka fjalën për Marrëveshjen e Ohrit ku me nenin 7 të saj për vetëmenaxhim të komunitetit serb, siç thotë deputetja e PDK-së, tejkalohet edhe “Zajednica”.
Deputetja Deliu Kodra shkruan se Kryeministrin Kurti sot nuk po e merr askush seriozisht, pasi sipas saj ai nuk mban një qëndrim, vetëm për të qëndruar në pushtet.
Shkrimi i plotë:
Një dekadë shpifje e akuza për tradhti kombëtare, e mbi të gjitha 10 vite të humbura për Republikën e Kosovës, që sot Albin Kurti t’i kërkojë ndërmjetësit të BE-së, Lajçak, që Serbia ta zbatojë të gjithë Marrëveshjen.
Kryeministri Kurti e ka fjalën për Marrëveshjen e Ohrit që me Nenin 7 të saj, për Vetëmenaxhimin e komunitetit serb, e tejkalon edhe Zajednicën, kundërshtimi i së cilës, bashkë me shumë kauza tjera të rrejshme, e sollën në pushtet.
I ndërtuar mbi gënjeshtra, shpifje e akuza, sot Kurtin nuk e merr askush seriozisht, sepse e kanë parë që ai nuk mbanë asnjë qëndrim, vetëm për të qëndruar në pushtet.
