Sot, mbushen nëntë vjet nga vetërrëzimi i qeverisjes PDK-AKR, si dhe vetëshpërndarjes së Kuvendit të Kosovës.
Koalicioni PDK-AKR ishte prishur me iniciativën e kryeministrit të atëhershëm Hashim Thaçi, por jo edhe me pëlqimin e kryetarit të AKR-së, Behgjet Pacolli. Këta të dy, bashkë me liderin e LDK-së opozitare Isa Mustafa kishin vendosur të shpërndahet edhe Kuvendi, pas takimeve me presidenten e atëhershme, Atifete Jahjaga.
Me 90 vota për 4 kundër dhe 3 abstenime, Kuvendi i Kosovës kishte marrë vendim më 7 maj 2014 që të shpërndante vetveten.
Me këtë vendim, Kuvendi kishte vendosur që të çojë Kosovën në zgjedhje të parakohshme parlamentare, të cilat ishin mbajtur më 8 qershor 2014.
Mocioni ishte ngritur nga një grup prej 57 deputetëve në bazë të marrëveshjes ndërmjet liderëve të PDK-së dhe LDK-së për shpërndarjen e Kuvendit.
Arsyetimin e kishte prezantuar deputeti i PDK-së, Arsim Bajrami, i cili kishte thënë se me këtë vendim, Kuvendi kishte hapur procedurat ligjore për shpalljen e datës së zgjedhjeve.
Nisma e deputetëve ishte mbështetur më pas edhe nga grupet parlamentare të PDK-së, LDK-së, përderisa ata të AAK-së kishin prezantuar qëndrime të ndryshme./KosovaPress/
