Malisheva ka triumfuar 2-1 në udhëtim te Drenica në kuadër të javës së 31-të në Albi Mall Superligën e Kosovës.
Pas vetëm pesë minutash lojë, vendasit kaluan në epërsi me anë të Agim Zekës, që shënoi për 1-0.
Por, festa e Drenicës zgjati vetëm, dy minuta, kur Malisheva i barazoi shifrat në 1-1 nëpërmjet Behar Maliqit që shënoi nga penalltia.
Mysafirët nuk u ndalën me kaq dhe përmbysën shifrat në 2-1 me golin e Tolat, ndërsa Ronald Sobowale ishte asistues.
Në 45 minutat e dytë, dy skuadrat kishin raste të mira shënimi, por jo edhe efektivitet.
Në minutën e 63-të, Drenica mbeti me dhjetë lojtarë në fushë, pasi Lopez da Silva – Maranhao u ndëshkua direkt me karton të kuq.
Ky nuk ishte kartoni i kuq i vetëm për skuadrën nga Skenderaj, pasi edhe në minutën e 90+4-të ata pranuan një të tillë, tani ishte Burim Veseli.
Ndeshja përfundoi 2-1 në të mirë të malishevasve që morën tri pikët të mëdha në luftën për mbijetesë.
Pas javës së 31-të, Malisheva gjendet në vendin e shtatë me 36 pikë, ndërsa Drenica në të fundit me 23 sosh.
