Napoli e regjistroi një fitore të madhe mbrëmë, e cila e afron edhe më shumë me titullin e kampionit në Itali.
Napolitanët e mposhtën Juventusin në shtëpi të tij me rezultat minimal, 1:0, në një ndeshje mjaft interesante, ku “Bianconeri” iu anulua një gol i Angel Di Maria.
Sidoqoftë, Amir Rrahmani me shokë festuan falë golit të vonshëm të Giacomo Raspadorit.
E pas lojës, festa e napolitanëve ishte vërtet e çmendur, si në fushë, ashtu edhe në tribuna, por edhe më gjerë.
Në fakt, Rrahmani e ka postuar një video në Instastory ku shihet teksa ishte lidhur live me tifozët që po festonin në Napoli, ndërsa festa nuk mungonte as në dhomën e zhveshjes së ekipit.
Napoli mund të shpallet kampion i Italisë në këtë javë, duke i dhënë fund pritjes prej më shumë se tri dekadash.
Rrahmani me shokë po e kalojnë një sezon të jashtëzakonshëm, ndërsa shkuan deri në çerekfinale të Ligës së Kampionëve.
