Komisioni Evropian ka përshëndetur nënshkrimin e aktit ligjor të Bashkimit Evropian për liberalizimin e vizave për Kosovën, duke u mundësuar qytetarëve lëvizje të lirë në Zonën Schengen më së voni nga 1 janari i vitit 2024.
Në një komunikatë për media, Komisioni Evropian ka deklaruar se lëvizja pa viza do të sjell përfitime për qytetarët si dhe do të forcojë më tej marrëdhëniet e BE-së me Kosovën.
“Lëvizja pa viza për bartësit e pasaportave të Kosovës do të bëhet realitet me 1 janar 2024 më së voni. Pas pajtimit të Parlamentit Evropian dhe Këshillit në bazë të propozimit të Komisionit Evropian, bartësit e pasaportave të Kosovës do të lejohen të udhëtojnë në Bashkim Evropian pa viza për një qëndrim maksimal deri në 90 ditë në periudhën prej 180 ditësh”.
“Lëvizja pa viza do të sjell përfitime për qytetarët në të dyja anët, do të forcojë edhe më tutje marrëdhëniet e BE-së me Kosovën. Kosova në vazhdimësi i ka përmbushur të gjitha kriteret dhe kushtet dhe ka dëshmuar përkushtim në këtë drejtim”, thuhet në këtë komunikatë.
Komisioni Evropian gjithashtu ka rikujtuar se në vitin 2016 i ka propozuar Parlamentit Evropian dhe Këshillit që qytetarëve të Kosovës t’u lejohet udhëtimi pa viza nga BE-ja.
“Komisioni vlerësoi se Kosova i ka përmbushur të gjitha kërkesat që nga viti 2018 , duke përmbushur të gjitha standardet e përcaktuara në Udhërrëfyesin për Liberalizimin e Vizave”, thuhet më tej.
Në Strasburg të mërkurën, 19 prill, është nënshkruar akti ligjor i Bashkimit Evropian për liberalizimin e vizave për Kosovën.
Eurodeputeti holandez, Thijs Reuten në një konferencë për media pas nënshkrimit të aktit ligjor pë vizat, tha se më në fund qytetarët e Kosovës do të lëvizin pa viza drejt Evropës.
“Më në fund para gjysmë ore nënshkruam aktin ligjor që u mundëson qytetarëve të Kosovës të lëvizin lirshëm drejt BE-së pa viza. Më në fund udhëtimi drejt BE-së për pushime, vizita familjare, udhëtime biznesi do të jetë më e lehtë”, tha Reuten.
Ai shtoi se lëvizja pa viza drejt BE-së për qytetarët e Kosovës do të bëhet më së largu më 1 janar 2024.
