Një vit pas hyrjes në fuqi të MSA-së si vështirësi kryesore për implementim të kësaj marrëveshje po konsiderohet hartimi dhe përafrimi i legjislacionit. Në këtë aspekt kjo edhe po konsiderohet si dështim i shtetit.
Kështu u tha në tryezën me temën “Një vit pas hyrjes në fuqi të MSA-së: A jemi me afër integrimit në BE?” organizuar nga Grupi për Studime Juridike dhe Politike në të cilën ka marrë pjesë ministrja për Integrime Evropiane Mimoza Ahmetaj, ambasadorja e Gjermanisë në Kosovë Angelika Viets dhe deputetë të Kuvendit të Kosovës.
Albana Merja nga Grupi për Studime Politike dhe Juridike tha se tha vështirësia kryesore e implementimit të MSA-së ka qenë në hartimin dhe përafrimin e legjislacionit.
Ajo tha se masat legjislative janë realizuar më shumë sesa masat zbatuese, ku sipas saj nga 178 masa legjislative janë realizuar plotësisht 76 prej tyre.
“Masat legjislative kanë të bëjnë pikërisht me hartimin e ligjeve, rregulloreve apo urdhrave të ndryshme si dhe masat zbatuese lidhen me zbatimin e këtyre ligjeve që duhet miratuar, por gjithashtu edhe me trajnimet e ndryshme të stafit të tjerë. Edhe po ta shikojmë masat e dyta janë zbatuar më shumë sepse nuk është përgjegjësi e drejtpërdrejtë e institucioneve por janë statistika apo trajnime që e rrisin përqindjen. Nga 178 masa legjislative që kanë qenë për tu realizuar gjatë gjashtëmujorit të dytë të 2016 janë realizuar plotësisht 76 prej tyre”, tha Merja.
Ndërsa, masat zbatuese sipas saj kanë qenë 236 prej të cilave janë realizuar 127.
Ambasadorja e Gjermanisë në Kosovë, Angelika Viets tha se MSA-ja dhe implementimi i saj është një pjesë esenciale e rrugës së Kosovës për në Bashkimin Evropian.
“Kemi shumë përkushtim nga popullata e Kosovës për integrim në BE, 94 përqind më duket janë numrat. Pra dëshiroj ta sqaroj se MSA-ja dhe implementimi i saj është një pjesë esenciale e rrugës së Kosovës për në BE dhe besoj se kjo është dëshira apo vullneti origjinal i Kosovës… Kemi pasur pak mungesa vitin e kaluar, ky raport nuk është befasues, unë nuk i kam dëgjuar shifrat më parë dhe është një shenjë që politika ka qenë më shumë e zënë me tema të tjera, para së gjithash me liberalizimin e vizave dhe kjo ka marrë shumë kapacitet dhe vëmendje. Më pas keni pas çështjen e demarkacionit, kjo e shpjegon një pjesë të vonesës pa elaborimin e mëtejmë”, tha ajo.
Ajo tha se këtë vit pret nga Qeveria që të jetë më e fokusuar, sepse sipas saj MSA-ja është detyrë me shumë rëndësi dhe se rruga për integrim në Bashkimin Evropian është implementimi i saj.
Për ministren e Integrimeve Evropiane, hyrja në fuqi e MSA-së ka shënuar kapitullin e parë në kuadër të procesit të integrimit të Kosovës.
“Deri në hyrjen në fuqi të MSA-së Kosova nuk ka pasur ndonjë raport formal me Bashkimin Evropian dhe Kosova ishte shteti i vetëm në rajon pa asnjë raport kontraktual me BE-në. Me hyrjen në fuqi të MSA-së, MSA ka krijuar një bazë të re ligjore dhe marrëdhëniet ndërmjet Kosovës dhe BE-së si dhe krijon një dialog të ri politik ndërmjet dy entiteteve në skenën ndërkombëtare. MSA-ja ka njohur entitetin ligjor dhe politik të Kosovës si palë në skenën evropiane dhe ndërkombëtare përmes një traktati ndërkombëtarë, neni 141 i MSA-së e njohu për herë të parë territorin e Kosovës dhe e nënvizoj që MSA-ja zbatohet në Kosovë.”, tha Ahmetaj.
Ajo tha se kjo është hera e parë që Kosova e nënshkruan një traktat ndërkombëtar me BE-në ku specifikohet qartë territori i Kosovës dhe sipas saj MSA-ja përbën hapin e parë zyrtar të Kosovës drejtë anëtarësimit në Bashkimin Evropian.
Anëtarja e komisionit parlamentar për Integrime Evropiane nga Lëvizja Vetëvendosje Donika Kadaj-Bujupi, tha se e kanë kundërshtuar nënshkrimin e marrëveshjes së MSA-së pasi që sipas saj ajo është nënshkruar duke ia kontestuar shtetësinë Kosovës, pasi që në dokument ishte vendosur fusnota që ishte bërë në marrëveshje me Serbinë dhe negociatat e Brukselit.
“Kosova dhe Serbia të dy vende do të siguronin që rrugën e tyre përkatëse evropiane do ta vazhdojnë në mënyrë të pa penguar dhe duke shmangur bllokimin e njërës apo tjetrës palë. Çka ndodhi realisht? Kosova u pengua në vazhdimësi me një diplomaci agresive jo vetëm me nismat rajonale, por edhe ndërkombëtare dhe këtu po e përmend UNESCO-n, sovraniteti i Kosovës u provokua shumë herë dhe kjo është sidomos temë para disa javësh treni i cili u nis nga Republika e Serbisë, i cili do të operonte pa licencë dhe me mbishkrime fashiste dhe shoviniste. Kosova pastaj u përballë edhe me ngritjen e një muri në veri të Mitrovicës i cili ishte në kundërshtim me gjithë legjislacionin ne Kosovë”, tha ajo.
MSA paraqet marrëveshjen e parë kontraktuale në mes të shtetit të Kosovës dhe Bashkimit Evropian.
