Rita Ora do të jetë e ftuar speciale sivjet në një nga netët e Eurovisionit.
Ajo do të performojë një potpuri hitesh të saj më të mëdha në festivalin evropian.
Artstja Rebecca Ferguson gjithashtu do të performojë në qytetin e saj të lindjes, Liverpool.
Duke folur për Eurovisioncast të BBC-së, ajo tha: “Është një festë e Liverpoolit dhe Ukrainës përmes muzikës”.
Ajo do të këndojë një duet me artistin ukrainas Alyosha.
Një nga nikoqiret e këtij viti, Julia Sanina do të hapë gjysmëfinalen e parë duke performuar me grupin e saj The Hardkiss.
Artistë të tjerë ukrainas që do të performojnë përfshijnë Mariya Yaremchuk, OTOY dhe Zlata Dzyunka, pasi Mbretëria e Bashkuar po e organizon sivjet Eurovisionin në emër të Ukrainës.
BBC tha se do të simbolizojë se si Mbretëria e Bashkuar është “United by Music (E bashkuar nga muzika)” – slogani i këtij viti për konkursin.
Rreth 160 milionë njerëz pritet të ndjekin Eurovisionin, duke e bërë atë një nga audiencat më të mëdha televizive në botë.
Eurovisioni nuk e pranon Kosovën si shtet pjesëmarrës në këtë festival, për shkak se ajo nuk është e anëtarësuar në EBU (Unioni i Transmetuesve Evropianë).
Por mesa duket sivjet Kosova do të gjejë një mënyrë për të depërtuar në Eurovision, duke kulmuar me një performancë spektakolare të realizuar nga artistja me famë botërore, e cila ka lindur në Kosovë.
